Chie semus

Chie semus?
Cantine di Orgosolo srl naschit in su 2007 , a pustis de unu cursu de
viticoltura e enologia amaniadu dae s’ Ersat pro sos massajos orgolesos.
Oe sos sòtzios sunt 15, ma b’at finas àteros binzaresos chi bersant s’àghina
issoro a sa Cantina.
In sa Cantina traballat un’enòlogo zòvanu chi contipizat totu su traballu dae sa
binninna a su binu e una segretària chi sighit sa contabilidade e chi accolozit
clientes e bisitadores.

Ite faghimus?
Sos sòtzios de sa cantina traballant binzas antigas, eredadas in famìlia e finas
cussas postas a nou sunt pastinadas cun puas de binzas betzas. In sas binzas
betzas sa bide est mantesa a fundu antigu, a garriadorza pudada a cannas
curtzas (a cordone isperonadu) in cussas noas. Su prus (90-95%) de sas binzas
sunt postas a àghina Cannonau, ma b’at finas fundos de Carignano, Muristellu,
Pascale (finas in sas binzas antigas b’aiat fundos o ghiradas de àtera gasta de
bide) e peri fundos de àghina bianca che a Granatza e Coròfulu.
Onzi sòtziu traballat sa binza a contu suo finas si su traballu est ghiadu dae sa
Cantina chi at postu règulas ca s’idea est cussa de mantènnere su manizu de
su connotu, rispetende s’ambiente e mantenende s’identidade de su binu e de
su territóriu inue benit fatu e a su matessi tempus de mezorare e abalorare su
frutu gràtzias a s’azudu de s’Universidade e de sos Entes pro sa chirca de sa
Rezione sarda.

Su canale de bèndida de prus importu est s’Horeca siat in Sardinna siat in
Continente mascamente in Roma e Milano. In foras de Itàlia bendet in Svizzera,
Germania, Olanda, in nord Europa e finas in sos Istados Unidos e in Brasile. In
sos annos colados at béndidu finas in Hong Kong e Macao.
Sa Cantina in custos annos at pigadu parte a unas cantas fieras (Vinitaly, Pro
Wein, e àteras) e a cuncursos che a Berliner Wine Trophy, Grenaches du
Monde, e àteros.
Su binu si bendet finas in Cantina chi est aberta 365 dies a s’annu tantu chi su
50% de su balanzu benit dae sa béndida in Cantina.

Sos istranzos sunt semper bene bénnidos finas ca sa Cantina amaniat bìsitas
ghiadas, tocat de prenotare in antis, pro tastare e assazare su binu paris cun
casos orgolesos de berveghe e de baca (Fiore sardo, Casizolu e àteros).
Sa Cantina amaniat finas jovios culturales ca pro sa Cantina su binu no at petzi
unu balore económicu ma finas culturale e sotziale. At unu balore identitàriu, e
podet èssere unu médiu de importu pro fàghere connòschere sa cultura e sas
traditziones de sa bidda orgolesa.
Finas s’enoturismu pro sa Cantina at un’importu semper prus mannu tantu chi
at pigadu parte a su prozetu “Borghi” cun s’idea de amparare e abalorare, cun
su binu, su territóriu e sa bidda.